මියන්මාරයේ ආගමන විගමන කාර්යාලය වෙත පැමිණි ශ්‍රී ලාංකිකයෙක් පාස්කු ඉරිදා ත්‍රස්ත ප්‍රහාරයට සැක පිට අත්අඩංගුවට - Video

මියන්මාරයේ ආගමන විගමන කාර්යාලය වෙත පැමිණි ශ්‍රී ලාංකිකයෙකු පාස්කු ඉරිදා ත්‍රස්ත ප්‍රහාරයට සැක පිට එරටදී අත්අඩංගුවට ගෙන තිබෙනවා. අබ්දුල් සලාම් ඉර්ෂාඩ් මොහොමඩ් නැමති 39 හැවිරිදි මොහු සිය වීසා බලපත්‍රය දීර්ඝ කර ගැනීම සඳහා යැන්ගූන් නුවර ආගමන විගමන කාර්යාලය වෙත ඊයේ පස්වරුවේ පැමිණි අවස්ථාවේ මෙලෙස අත්අඩංගුවට ගෙන ඇති බව සඳහන්.

අදාළ පුද්ගලයා අත්අඩංගුවට ගැනීම සඳහා මියන්මාර සංචාරක පොලීසිය බදාදා දිනයේ එරට සියළුම හෝටල් සහ සංචාරක නිකේතන වෙත දැනුම් දීමක් කර තිබුණා. 2018 වසරේ ජනවාරි මාසයේ සංචාරක වීසා මත මියන්මාරයට ගොස් ඇති මොහු නැවතත් එරටින් පිට වූ බවක් වාර්තා වී නැහැ.

කෙසේ නමුත්, එම ශ්‍රී ලාංකික සැකකරු පාස්කු ඉරිදා ප්‍රහාරයට සම්බන්ධ වී ඇති ආකාරය හෝ ඔහු අත්අඩංගුවට ගැනුණේ ලක් රජය විසින් සිදුකළ දැනුම්දීමකට අනුව ද යන්න බලධාරීන් හෙළි නොකළ බවයි මියන්මාර මාධ්‍ය සඳහන් කළේ. එමෙන්ම, පාස්කු ඉරිදා ප්‍රහාරයට සැකකරුගේ සම්බන්ධතා පිළිබදව මියන්මාර පොලීසියේ විශේෂ ශාඛාව මගින් විමර්ශනයක් සිදුකරන බව ද ඉරවඩ්ඩි නැමැති මියන්මාර පුවත්පත වාර්තා කළා.

එරට සංචාරක පොලීසිය ප්‍රකාශ කළේ අබ්දුල් සලාම් ඉර්ෂාඩ් මොහොමඩ් වසරක් සහ මාස දෙකක කාලයක් වීසා බලපත්‍රය ඉකුත් වීමෙන් අනතුරුව ද මියන්මාරයේ රැදී සිට ඇති බවයි. එමෙන්ම මියන්මාරය තුළ අයි.එස්. අනුගාමික විදේශීය ත්‍රස්තවාදීන් ප්‍රහාර දියත් කිරීමේ අවදානමක් පැවති බව ද මියන්මාර පුවත්පත වැඩිදුරටත් සදහන් කළා.

No comments

Powered by Blogger.