රට තුල නිදහස් අධ්‍යාපනය වෙනුවෙන් වෙන් කරන මුදල ප‍්‍රමාණවත් නෑ - ගෝඨාභය රාජපක්ෂ - LEN - www.lankanenews.com | Latest news from Sri Lanka in Sinhala

රට තුල නිදහස් අධ්‍යාපනය වෙනුවෙන් වෙන් කරන මුදල ප‍්‍රමාණවත් නෑ - ගෝඨාභය රාජපක්ෂ


රට තුල නිදහස් අධ්‍යාපනය වෙනුවෙන් වෙන් කරන මුදල ප‍්‍රමාණවත් නොවන බව ශ්‍රී ලංකා පොදුජන පෙරමුණේ ජනාධිපති අපේක්ෂක ගෝඨාභය රාජපක්ෂ මහතා පවසනවා.

අධ්‍යාපන ක්ෂේත‍්‍රයේ ඉහළට යන්න අපේ දරුවන්ට අවස්ථාව ලබා දෙන්නේ නැත්නම් අපිට ඉදිරි ආර්ථික සැළැස්මක් ගැන කතා කිරීමේ හැකියාවක් නොමැති බවයි ඔහු පෙන්වා දෙන්නේ.

ජාතික පෙරපාසල් ගුරු වෘත්තීය ජාතික සම්මේලනය අද (01)කොළඹ ප‍්‍රදර්ශන හා සම්මේලන ශාලාවේදී පැවැති අවස්ථාවකට ඒක්වෙමින් ඔහු වැඩිදුරටත් මෙලෙස අදහස් දක්වා සිටියා.


"පෙර පාසල් සදහා දරුවන් වැඩි වැඩියෙන් යොමු කිරීමත් ඒ සදහා දෙමව්පියන්ගේ අවධානය යොමු කිරීමත් අවශ්‍යයි. දැනටත් අපේ සමහර අඩු ආදායම් ලබන පවුල්වල දරුවන් පෙර පාසල් අධ්‍යාපනයට යොමු වීමේ ප‍්‍රවණතාවය අඩුයි. 

පෙර පාසල් අධ්‍යාපනයේ වැදගත්කම දෙමව්පියන්ට අවබෝධ කරවිම සදහාත් වැඩපිළිවෙලක් අවශ්‍යයි. විශේෂයෙන් අඩු ආදායම් ලබන පවුල්වල දරුවන්ට පෙර පාසල් අධ්‍යාපනය සඳහා වූ ශිෂ්‍යත්ව ක‍්‍රමයක් ඇති කිරීම සම්බන්ධයෙනුත් අපේ අවධානය යොමු වී තිබෙනවා.

ඒ වගේම පෙරපාසල් ගුරුවරියන්ගේ දැනුම වැඩිකර ගැනීම සදහා අවස්ථාවන් සැපයීමත් රජයක වගකීමක් ලෙස අපි සලකනවා.

පෙරපාසල්වල ගුණාත්මකභාවය වැඩිකරන්න නම් ගුරුවරියන්ගේ දැනුම වර්ධනය කළ යුතුයි කියන ස්ථාවරයේ අපි සිටිනවා.

ඇමරිකාව ඇතුලූ විදේශීය රටවල් රැසක ආසියානු රටවල ගුරුවරු සේවය කරනවා. ඒ රටවල දරුවන්ගේ අධ්‍යාපනයේ මූලික අඩිතාලම යොදන්නේ  අපේ ගුරුවරු.

ඒ රටවලදී අපේ ගුරුවරුන්ට විශාල පිළිගැනීමක් ලැබෙනවා විතරක් නෙවෙයි ඔවුන්ට දැනුම වැඩිකර ගැනීමේ අවස්ථාවන්ද ලැබෙනවා. මෙවැනි ක‍්‍රමවේදයන් අපේ රට තුලත් ක්‍රියාත්මක කිරීම මගින් ගුරුවරියන්ට දැනුම වර්ධනය කර ගැනීමේ අවස්ථාව සැලසිය යුතුයි.

මෙවැනි වෘත්තීය සමිතියක් කි‍්‍රයාත්මක වීම මගින් පෙර පාසල් ගුරුවරියන්ගේ අදහස් හා යෝජනා සාකච්ඡා කර පෙර පාසල් විධිමත් කිරීමේ අවස්ථාව හිමි වෙනවා. ආර්ථික සැලැස්ම සකස් කර ගැනීමට හැකි වෙන්නේ අධ්‍යාපන ක්ෂේත‍්‍රයේ දියුණුව තුළිනුයි.

උසස් පෙලට පෙනී සිටින සිසුන්ගෙන් ලක්ෂ දෙකක පමණ ප‍්‍රමාණයක් වසරකදි උසස්පෙල සමත් වෙනවා. ඉනුත් 35000ක පමණ පිරිසකටයි විශ්ව විද්‍යාලයට ඇතුල්වීමේ හැකියාව ලැබෙන්නේ.

මේ ක‍්‍රමයත් අපි වෙනස් කළ යුතුයි. ඒ අයුරින් කිසියම් සිසු පිරිසකට අතරමං වෙන්න සිදුවෙන්නේ නිසි අධ්‍යාපන ප‍්‍රතිපත්තියක් නැති නිසයි. විවිධ වෘත්තීන්වලට කුඩා කළ සිටම ළමා මනස යොමු වන අයුරින් අපේ අධ්‍යාපනය සකස් විය යුතුයි.

රටේ ව්‍යාපාර ක්ෂේත‍්‍රයේ සිටින බොහෝ දෙනෙක් සදහන් කරන්නේ රැකියා අවස්ථා තිබුණත් බොහෝ තරුණ තරුනියන් ඒ අවස්ථා ලබා ගන්නේ නැති බවයි.

බොහෝ වෘත්තීන් පහත් කොට සලකන මානසිකත්වයක් අපේ සමාජයේ පවතිනවා. පෙර පාසල් අධ්‍යාපනයේ සිට මේ තත්ත්වයන් වෙනස් කිරීමේ වගකීම පවතින්නේ ඔබ මතයි.

ආසියාව ආර්ථිකයේ කේන්ද්‍රස්ථානය බවට පත්ව තිබෙනවා. එ් නිසාම අපිට අවස්ථාවන් රැසක් හිමිව තිබෙනවා.රටේ ආර් ථිකය දියුණු කරමින් ඉහළ වේතනයක් ලබන තත්ත්වයක් අපිට උදාකර ගැනීමේ හැකියාව තිබෙනවා. ඒ සදහා අපේ තරුණ තරුණියන් පුහුණු කළ යුතුයි.

රට වෙනුවෙන්  විශාල සේවයක් කරන ඔබ, රටේ ඉදිරි අනාගතය සැලසුම් කරන පිරිසක්. දරුවන්ගේ හැකියාවන් වගේම විශේෂ අවශ්‍යතා තිබෙන දරුවන් ගැනත් ඔබලා අවධානය යොමු කරනවා.

අපි ඔබගේ කාර්යය , සේවය අගය කරනවා. විශේෂ අවශ්‍යතා සහිත දරුවන් වෙනුවෙනුත් විශේෂ වැඩපිළිවලක් අවශ්‍ය බව අපි විශ්වාස කරනවා. ඔබේ සේවය වෙනුවෙන් අපේ රජයක් තුළ නිසි ගෞරවය හිමි වන බව සදහන් කරනවා."

No comments

Powered by Blogger.